E iai tulafono ma ta’iala e faatonutonu ai le faaaogāina o alatetele o le malo, ae ua aliali mai i le tautiga o nisi o nuu ma afio’aga auā le faamatagofieina o Samoa i le taligamalo o loo loma nei, ua sopo nisi o teuga o aai ma ua lē tāpā muamua le pulega o feoa’iga i le laueleele o latou e maua ai le faamaninoga.
Ua vali sese i nisi o galuega o teuga aai pa apa o loo faailoa ai pi’oga o le alatele.
Ua lē o le lanu samasama o le lanu lea e iloa gofie ai ia faailoilo ae ua vali pa’auli ma ua leiloa i le po.
O nisi o teuga aai e pei ona molimauina i se pitonuu o le taulaga i le aga’i i Mulinuu ua tusi ai le igoa o Samoa i le ogatotonu o le auala i le vaega o loo iai laina tositosi papa’e.
O se vaega o Taufusi ua tatau ai se fu’a poo se banner ua faatalofa ma faatofa ai i malo malaga mai i le Fono a Malo o le Taupulega.
Peitai o lea ua onosa’ia e le Pulega o Feoa’iga i le Laueleele le Samoa Land Transport Authority le vali sese e nisi o faailoilo o le auala, ae ua taatia se’i mae’a le Fono a Malo o le Taupulega ona toe aga’i lea o lana aufaigaluega e vali i lanu sa’o o ia faailoilo tāua o le alatele.
O le fu’a na tatau i se vaega o le alatele i Taufusi ua fautuaina le toe ave i lalo.
Ua faailoa e se molimau e tatau ona tāpā muamua se pemita faataga mai le pulega o feoa’iga i le laueleele.
E iai nisi o nuu o loo fuafua e fau ma faatutū ni faitoto’a, ae e iai aiaiga faaletulafono e tatau ona faamalieina muamua. Ua ave le faafetai a le pulega o feoa’iga i le laueleele i le atunuu i le galuega faamatagofie ma le lagona fai mea lelei ma silisili i le taligamalo a le atunuu, atonu o le mafuaaga foi lea o le oo o a latou teuga i tulaga e mana’omia ai le tausisia o ta’iala ma tulafono o le saogalemu o alatetele.
