O le kuata mulimuli faalea’oa’oga o lenei tausaga o le a ulufale ai fanau ua aafia i sauāga, lea o loo tausia e le faalapotopotoga o le Toomaga mo Ē Puapuagatia, i le a’oga faata’ita’i ua faaigoaina o Queen Camilla Pres School of Hope.

O lea a’oga o loo i totonu o le nofoaga o loo vaaia ma tausia ai nei fanau i Tuanaimato i le lotoā a le Toomaga, ma sa tatala aloa’ia e le Masiofo a le Tupu o Peletania a o iai i Samoa ma afea ai e le Masiofo o Camilla lea nofoaga.

Faaalia e le Pelesetene o le Toomaga mo Ē Puapuagatia, o se tasi lea o miti a le faalapotopotoga o le iai o se a’oga faata’ita’i mo fanau ua sauāina e a’ooga ai, a o tausia ma vaaia e le faalapotopotoga.

O le galuega o le falea’oga mo le a’oga faata’ita’i o le Queen Camilla Pres School of Hope, na faatupe i le fesoasoani a le Ekalesia a Iesu Keriso o le Au Paia o Aso e Gata ai, faapea nisi o fesoasoani a auaunaga tuma’oti i Niu Sila ma Ausetalia faapea le Pacific Assist.

O le tausaga fou 2025  e faamanatu ai le 20 tausaga talu ona faavae le auaunaga tuma’oti a le faalapotopotoga o le Toomaga mo Ē Puapuagatia, ma o se tasi lea o ana matati’a ua faamauina, o le afea e le Masiofo o Camilla o le auaunaga a le faalapotopotoga.