Ua faailoa e le Tamaitai Minisita o Tina ma Tamaitai Atinae o Afioaga ma Aga Fesootai le Afioga Mulipola Anarosa Ale Molioo o le isi tala ua oo atu e teena e le sui Faipule o Faasaleleaga 5 le faaiuga e faasee ese ma le tofi Taitaifono o le Fono Faavae o lo latou itumalo.

Na fesiligia le Tamaitai Minisita i mafuaaga ua ala ai ona talia e le komiti galue o le poloketi miliona tala le tusi ua tuuina atu e le Itumalo e ala i le komiti o le Fono Faavae ma ia ta’ua ai ua lava mau e tatau ai ona tilotilo le komiti i le tāua o le poloketi lenei ina ia oo i tagata ma ia ausia le faamoemoe o le malo i lana poloketi.

O mafuaaga na ta’ua na amata mai lava i le 200 afe tala muamua na tuuina atu mo le fausia o le ofisa o le Fono Faavae peitai ua faaaogā lea tupe e tanu ai le fanua ma o loo ta’ua ai o le konekarate a lona lava atalii na faia le tanu, sa faailoa foi e Mulipola e lē o iai se vaega i le taiala mo le faamatuu atu o le seleni lea e faaaogā i ni tanu.

O le isi tulaga o le fanua lea o loo i luma o le tanu na faia, o loo iai le fale o loo iai le apili a le aiga e ona le fanua ma ua mautinoa ai e leai se taimi e mafai ai ona faaaogā e le Fono Faavae ona o tulaga i mataupu o faamasinoga tau fanua, aemaise ai o le lipoti a le suetusi o loo paleni lelei mai mea uma peitai i auiliiliga, ma sailiiliga ua fesiligia ai ona e lē o ogatasi sailiiliga ma taiala ma faigafaave o le 200,000 muamua lea na faamatuu atu. 

Na faailoa o le vaaiga a le Komiti galue ua lava mau ma ua manatu ai pe o le a saga vaai ea i le alii Faipule ae lē se’i silasila i ē o loo faapitoa iai le faamanuiaga lenei.

Na ta’ua foi e le Tamaitai e lē o malolo foi lona ofisa i tagata o le itumalo e agai atu.