O loo fesiligia pea le auai ma le lē auai o le malo o Niu Sila i le fuafuaga a Malo Aufaatasi, o le lagolagoina lea o le tali ma lasaga ua faatulagaina e le Faamasinoga Faavaomalo poo le International Court of Justice e aga’i tonu i matāupu tau i suiga ma’ale’ale o le tau.
Faamauina o loo tālia se taimi e faatino ai palota a atunuu i le fonotaga a le UN General Assembly pe latou te lē lagolagoina fuafuaga ua folasia e le ICJ.
Mo le silafia o lenei fuafuaga o le a tali ai atunuu eseese i ona tulaga faaletulafono pe a maua le tele o aafiaga o kasa oona mai ia atunuu.
O lenei matāupu, e pei ona ta’imua ai Vanuatu, ae na lagolagoina e le silia ma le 60 atunuu e to’atele e mai le Pasefika, talu ai o atumotu mai le Pasefika e aofia ai ma Samoa o loo molimauina le matua’i aafia tele i le suiga o le tau, e pei ona iai le siisii pea i luga o le suāsami.
I ripoti mai le RNZ, na faailoa ai o lea lava na lagolagoina e Niu Sila le fuafuaga o le talosagaina lea o se manatu faaletulafono mai le ICJ e tusa ai ma nei matāupu i le tausaga e 2023.
Ae o loo tālia nei poo le mea ua lagolagoina la e Niu Sila le taunuuga ua oo iai lea matāupu.
Ae i le lē maua ai o se tali a Niu Sila poo fea e tu ai, o lea ua upuia e nisi o tagata galulue o le si’osi’omaga ma tagata e galulue i tulafono, sa tatau ia Niu Sila ona lē tau matematea le itu e auai iai, e tatau ia Niu Sila ona tu mo nai atunuu o le Pasefika ona o aafiaga tetele o loo fetaia’i pea ona o suiga o le tau.
Mo le silafia o le matāupu foi lenei lea sa auai atu ai sui mai Samoa, o lē sa avea ma Loia Sili o le atunuu i lena taimi, Su’a Hellene Wallwork, Faauluuluga o le Matāgaluega o le Va i Fafo, Peseta Noumea Simi ma isi e tuuina atu sa latou mau e tusa ai ma aafiaga ua iai nei suiga o le tau.
O lea sa auai atu ai ma lē sa avea ma Sui Loia Sili o Samoa o Letoafaiga David J. Fong, faapea sui o Samoa i atunuu i fafo, o Sauiao Francella Strickland, le Amepasa o Samoa i le malo tele o Netherlands ma Belgium, Seve Esekia Soloi, Associate Public Solicitor, Ofisa o le Loia Sili, Rae Manuleleua First Secretary, Amepasa o Samoa i Peleseuma, Brendan Plant ma Fleur Ramsay, Expert Legal Consultants ia na auai faatasi i lea taimi mo le finauina o lea matāupu, ina ia tali atunuu tetele i le tulafono ona o aafiaga o suiga ogaoga o le tau.
Puna o Faamatalaga: https://www.rnz.co.nz/news/political/595785/nz-s-support-for-landmark-climate-change-ruling-in-doubt
