E lata i le 20 sui o le tineimū na taumafai atu e tineia se afi tele na aafia ai se fale i Mātū o Aukilani, i le vaveao analeila (Aso Faraile).
Lipotia mai e le leitio faavaomalo a Niu Sila, na valaau ane le vaega o le Tineimū ma Faalavelave Tutupu Faafuase’i, Fire & Emergency (FENZ) i se faalavelave na tula’i mai i Gibbs Crescent i le faaitu o Red Hill poo le 19 minute e te’a ai le 3 i le vaveao.
Faamauina e 3 ni vaega poo crews, 2 pamu poo pumps ma le commanding unit poo le vaega e nafa ma le māta’itūina o le galuega i le taimi na faatino ai le galuega a sui i le tau tineia o le mū.
Talu ai o le fale na aafia o se fogafalelua, o lea na māua ai le iai o le vaega o luga o le ‘ea poo le aerial unit na taumafai malosi e tapē le afi.
Faamanino e le vaega o le Tineimū ma Faalavelave Tutupu Faafuase’i, na mafai ona tineia le afi i totonu o le itula, ma na mafai ona faasaoina mai ma le saogalemu tagata na nonofo i totonu o lea fale, e le’i iai se tasi na faamanu’aina.
Faailoa na iai lava sui o le vaega a le tineimū i lea nofoaga i le taeao analeila i le ‘afa o le lima e fesoasoani atu i le ‘ausu’esu’e i tulaga e sa’ili ai poo le ā tonu le māfua’aga na tula’i mai ai lenei malaia.
Puna o Faamatalaga: https://www.rnz.co.nz/news/emergencies_local/595276/occupants-safe-after-fire-at-two-storey-house-in-auckland
