E to’atasi ua faamaonia ua maliu i le faalavelave i le vaiaso nei i se fale i le itu i Saute i Sisifo o Sini.
Ua ta’ua e le 9News o lē ua maliu o Alai Ahio e 28 tausaga le matua, na maliu i le falema’i i le mae’a o se faalavelave i se fale i Canley Heights i Sini lava.
Fai mai o ia ma isi alii sa osofa’ia a o saofafa’i i totonu o se faletaavale o le fale lea ae o loo ta’ua foi o lē ua maliu sa avea ma sui o le kulupu e faaigoa o le OneFour.
Ua faailoa i le lipoti o lē ua maliu ma le isi alii e 32 tausaga le matua, sa ave ane uma i le falema’i i Liverpool ma aafia i manu’aga, fai ai le ta’otoga o Ahio ma maliu ai lava, ae o le isi o loo taofia pea i le falema’i o loo tigāina.
E le’i leva ae ave ane foi i le falema’i i Fairfield isi alii e to’alua, e 22 ma le 23 tausaga le matutua e tigāina foi, fai mai o manu’aga mai se fana.
I se taimi mulimuli ane na toe ave ane ai foi se isi talavou e 19 tausaga le matua, i le falema’i lava i Liverpool o loo faamanu’alia foi.
Fai mai leoleo i le lipoti, o lē ua maliu ma le isi to’afā e pei ona ta’ua e masani uma ma o loo faaauau nei le su’esu’ega aemaise i le kulupu ua faaigoa o le coconut cartel.
Puna o Faamatalaga: https://www.9news.com.au/national/canley-heights-shooting-at-least-one-dead-four-seriously-injured/7be74194-cf0c-4b0a-8191-b094e0cc0320
