O le Aso Faraile na te’a nei sa faatulaga e lau ai se faasalaga o moliaga e valu ua faama’ona o Mase Mahonri Schwalger sa avea ma faia’oga ulu o le Manu Samoa, peita’i ua tolopō i le Aso Gafua a sau le aso 15 o Iuni, se’i tapena atu se tali a loia mo le itu a leoleo i talosaga e lua ua tuuina atu e le loia a Mase.
O ia talosaga e aofia ai le taofi o le lauina o se faasalaga ae se’i iloilo muamua le talosaga ua finau ai lē ua molia ma lana loia e toe iloilo pe apili le faai’uga ua faamaonia ai moliaga o le faaoolima matagā ma le faiaiga fai faamalosi.
O loo tetee loia a leoleo i ia talosaga ona o le finauga e tatau ona lau muamua le faasalaga ona avanoa ai lea ona faia se talosaga apili.
Faaalia e loia a leoleo o faiga masani ia e tusa o le ta’iala faaletulafono o loo lima ta’ita’iina ai galuega a le faamasinoga ma e le’i teuteuina lava lea ta’iala tau tulafono o galuega a le faamasinoga.
