E taunuu fautasi e lima i le vaega e amata ai tuuga i gataifale o Faleula, o loo faatali le taunuu atu o le fautasi o le Tolotolo o Tamauli, ae ina ua taunuu lea Sa ma pii maea uma kapetenei o fautasi e ono, na pa e fana ma amata le tuuga muamua e faaaogā ai foe laau poo foe Samoa ua oso le Telefoni o le Vainuu ma pito i luma.
O le faaosoga lava lea i le amataga na taunuu le Telefoni i le tini o taumafai atu pea le Tolotolo o Tamauli ae le’i toe maua.
O le faai’uga o le tuuga fautasi muamua, ua siamupini le fautasi o le Telefoni o le Vainuu, tulaga lua le fautasi o le Tolotolo o Tamauli, tulaga tolu le fautasi o le Malu o Samoa, tulaga fā le fautasi o le Little Rina, tulaga lima le fautasi o le Tausala o le Vasaloloa, ae tulaga ono ai le fautasi o le Sheraton Apia Maroon.
I faasalalauga tuusa’o o tuuga fautasi na faatalanoa ai le kapeteni o le Telefoni o le Vainuu le susuga Leiataua Jerry Brunt.
Le susuga Leiataua Jerry Brunt le kapeteni o le fautasi o le Telefoni o le Vainuu sa faatalanoa e le tofa Vaasiliega Iupati Lagaaia, sa faasalalauina le tuuga i le TV 9 o se auaunaga faasalalau a le malo.
