O le Aso Lulu le ogatotonu o lenei vaiaso ua toe tauaofia ai galuega a le faamasinoga o palota mo le su’esu’eina o le tagi o tuua’iga o faiga faaālatua e māfua mai i le palota laitiiti a Vaimauga 3, lea na toe sa’ili ai se sui usufono o lea itumalo palota ma manumalo ai le afioga Lautimuia Uelese Vaai.
O le afioga Taioaliiseu Fiti Aimaasu sa seei i le nofoa o le itumalo ae na faamavae ma le tofi o Vaimauga 3 ina ua suia lana lagolago mai le vaega e puipuia aiā tatau a tagata i le patī faaupufai o le Faatuatua i le Atua Samoa ua Tasi, ua faauluina lea tagi ua molia ai le sui faipule i le ave o tupe i nisi o tagata palota ma ofoina le taavale e aumai ai i le fale ma toe momoli se tagata palota.
Ua faaulu foi e le afioga Lautimuia Uelese Vaai lana tagi ua tali atu ai i moliaga foi o faiga faaālatua i faatosina o lea palota laitiiti faasaga i le afioga Taioaliiseu Fiti Aimaasu.
O le Aso Lua o le vaiaso na te’a nei na valaau ai mo le taimi muamua lea tagi tau palota ma faatulaga ai loa le Aso Lulu o le vaiaso nei e amata su’esu’e ai molimau.
E to’alua faamasino o le Faamasinoga Maualuga o le a seei i le su’esu’eina o le tagi tau palota mai Vaimauga 3.
