Ua matua’i faaali le lē fiafia o le Minisita o le Va i Fafo a Ausetalia, Penny Wong i se tasi o minisita a Isaraelu na ia faasoa i upega tafa’ilagi se video o loo faailoa ai le faatigāinaina o se kulupu o pagota lea ua lipotia o loo ono aofia ai ma ni tagata Ausetalia.
O le minisita Isaraelu e suafa ia Itamar Ben Gvir, o le Minisita o le Puipuiga a le atunuu o Isaraelu, sa ia share pe faasoa ata o lona asia o se nofoaga o loo iai tagata e lagolago ia Palesitina lea o loo taofia i le mae’a ona aofia i se kulupu mai Gaza.
Ua faailoa e le 9News e oo atu i le to’a 11 tagata Ausetalia na pu’e e Isaraelu ona o lo latou tetee ia Isaraelu.
O le video o loo faailoa ai le una’iina o se tama’ita’i i le foloa ma ata o nisi o loo loka lima ma faamalosia le faatootutuli i le foloa.
Fai mai Penny Wong ma le to’atele ua maimoa i ia videos, e lē talitonu i ata o loo aumai ai ma e latou te lē taliaina ia ituaiga gaioiga.
Faailoa foi e Wong ua mae’a faatonuina le amepasa o Isaraelu i Ausetalia ia faamautinoa e lē o aafia ni tagata Ausetalia i ia ituaiga sauāga.
Ua mae’a faailoa foi le lē fiafia o le Palemia o Isaraelu, Benjamin Netanyahu i gaioiga a le minisita Isaraelu lea o Ben Gvir.
