E lē o faatafatafa le faaauau ai pea ona siita’i le tau o oloa tau suāuu ma penisini i atunuu o le lalolagi e pei foi o Samoa.
O le masina fou lenei o Iuni ua tau fai sii uma le tau o le penisini, le kiso ma le kalasini ma ua faamauina ai o le masina ua alu atu nei o Me ma le masina fou lenei ua sii maoa’e ai le tau o lea oloa mana’omia.
O le penisini o lona tau fou e 3 tālā 99 sene i le lita, i le masina o Me sa 3 tālā 51 sene i le lita le tau o le penisini, lona uiga e 48 sene le siitaga fou.
O le suāuu kiso poo le diesel o le tau fou ua 5 tālā 31 sene i le lita, i le masina o Me sa 4 tālā 50 sene i le lita, o le siitaga fou ua faaopoopo le 81 sene i le tau o le suāuu kiso i le lita e tasi.
Ma le kalasini o lona tau i le masina lenei o Iuni ua 5 tālā 02 sene i le lita, o le masina o Me sa 4 tālā 05 sene i le lita, o le siitaga fou ua faaopoopo le 97 sene i le tau o le kalasini i le lita.
O le siitaga maualuga o le tau o ia oloa ua tapena ai nei se siitaga fou i le totogi o pasese mo pasi ma taavale laiti la’upasese poo taxi ina ia tau faafetaui ai le sii o le tau o suāuu ma penisini.
