O le puipuia o ogasami faatulafonoina o Samoa mai le fagotaina i ni faiga solitulafono o se galuega tāua lea o loo fesoasoani ai le malo o Farani i se faigāpaaga ma malo o Niu Sila ma Ausetalia, ae i sootaga faavaomalo o Farani ma Samoa o se isi lea o lagolago malosi a lea malo i le māta’itūina o ia gaioiga solitulafono, e lē gata o vaa fagota e afea o ogasami o Samoa e aunoa ma se faatagaga, ae o le faaaogā o tatou ogasami e fela’ua’i ai fuālaau faasāina.
O se ofisa sinia i le vaega o faigāfaiva a Samoa le susuga Vaa Reupena sa tuua Samoa i se vaalele o le fitafita a Farani faatasi ai ma sui o le fitafita o le sami a lea malo, mo se galuega na siaki ai ogasami uma o Samoa i se taumafaiga e māta’itū gaioiga solitulafono i le fagotaina e vaafagota tetele o isi atunuu.
I se pepa o faamatalaga mai le ofisa o le malo o Farani i Apia ua faailoa ai, o se tasi lea o galuega o loo fesoasoani ai le fitafita o le sami a lea malo i se faigāpaaga ma le ofisa tutotonu o faigāfaiva o le Pasefika o loo i le atunuu o Solomona.
O le auai o le susuga Vaa Reupena i lea galuega ua maua ai ma lona silafia i tulaga e ao ona tapena iai, mo le puipuiamalu o ogasami o Samoa mai faiga solitulafono.
