O le Aso Lulu o le vaiaso nei e amata ai ona faagasolo le galuega a le ofisa o le komisi o faigāpalota mo le lesitalaina o tagata palota ua agavaa i le itumalo palota o Safata 2 a o lumana’i ai lana palota laitiiti lea e le’i faailoaina le aso e faia ai.
Ua faailoa e le ofisa o le komisi o faigāpalota o le maota o le Ekalesia Katoliko i Mulivai Safata o le a amata ai le galuega i le Aso Lulu, ma faasolo ai i le maota o le EFKS i Tafitoala i le Aso Tofi ma le maota o le EFKS i Fausaga i le Aso Faraile.
E faaauau le galuega o le lesitala i le Aso Gafua e oo i le Aso Lulu o le vaiaso a sau i afio’aga o Fusi, Vaie’e, ma Nuusuatia.
O le tauaofiaga a le Palemene i le masina o Me na faamavae ai le sui faipule o Safata 2 ma le nofoa o le itumalo ina ua suia lana lagolago mai le pati faaupufai e puipuia aiā tatau a tagata, i le vaega faaupufai o le Faatuatua i le Atua Samoa ua Tasi.
