Ua iai lipoti i le vaiaso nei ua ta’ua ai le tulaga pagatia ua iai i totonu o Afghanistan.
To’atele aiga ma tagata ua faigatā tele ona soifua i le soifuaga i aso ta’itasi ona o le lē gafatia o le faasoa, leai ni galuega ma leai foi ni tupe e faatau ai ni mea’ai ma tausi ai aiga.
O nisi foi o faamaumauga mai Malo Aufaatasi ua faailoa ai le to’atele o le ‘au leai ni galuega, o le tulaga foi tau le soifua mālōlōina ua faaletonu lava ma ua faaitiitia foi fesoasoani ua latou maua.
E lē fua tasi i se itumalo o Afghanistan lenei faafitauli e pei ona lipotia e le BBC, fai mai nisi o molimau i le ‘aufaasalalau, o mātua ua i’u ina o latou faapea ane ua sili ai le oti nai lo le vaai atu i le fia aai o le fanau ma le aiga ae ua leai se mea e mafai ona tagolima iai.
O nisi ua faasoa ane ua maliliu isi fanau ma aiga ona o le lē lelei o le tausiga.
O se tasi tamā sa ia faamatala i le BBC o ia ua sauni e faatau atu lana fanau teine ona ua mativa ma tele aitalafu ma ua lē maua se fesoasoani.
O Amerika le atunuu sa tele lana fesoasoani ia Afghanistan peita’i sa faamuta lea tulaga i le tausaga talu ai ae faapea foi i isi atunuu.
O le mugalā ua feagai ma le atunuu ua atili faatetele ai faafitauli mo le faigāmalo a le Taliban lea o loo tula’i mai i le tofi talu mai le 2021.
Puna o Faamatalaga: https://www.bbc.com/news/articles/c0q25dwj807o
