O le lua miliona tālā ua faailoa e le malo o Ausetalia o le a fesoasoani e lagolago ai galuega a faalapotopotoga tuma’oti i Samoa na māfua ai se feiloa’iga a le tama’ita’i Kovana Sili o lea malo ma sui o nisi o auaunaga tuma’oti, a o iai i Samoa i le faamanatuina o le Tuto’atasi, ma tatala nisi o galuega o loo faatupe e Ausetalia.
I lea feiloa’iga ma sui o le Toomaga mo ē Puapuagatia, o le S.F.A., Nuanua o le Alofa, faalapotopotoga o tina faipisinisi, faalapotopotoga o tina faifaato’aga, SENESE ma le Caritas na faailoa ai le agaga faagaeetia o le Kovana Sili ona o le maoa’e o tautua a ia faalapotopotoga tuma’oti i Samoa, ona o tagata lautele o loo fia maua le fesoasoani o loo taula’i iai a latou auaunaga.
O le fautuaga a le tama’ita’i Kovana Sili o Sam Mostyn i ta’ita’i o ia auaunaga tuma’oti ia faaauau pea ona ua faatuatuaina le latou galuega lelei auā o leo o tagata e fia maua se fesoasoani o loo ave iai le latou faamuamua.
O polokalame fesoasoani a Ausetalia o loo afea ai ia faalapotopotoga i foai tupe mo le unaia oa latou auaunaga ma tautua.
