A o lumana’i ai se a’oa’oga i le faai’uga o lenei vaiaso o le a faia i le nofoaga o le Tiapapata Art Center mo le talanoaina le tāua o laau o loo ola i laufanua o Samoa, e to’alua ni taulasea poo ni fofō o ma’i Samoa o le a auai i lea a’oa’oga ona o le tāua o lo la silafia i laau e fai ai vai e togafiti ai gasegase poo ma’i o le tino.
O tinā o Saumalu Teofilo ma Purinisese Futi o ni taulasea o ma’i Samoa ua leva tausaga o la faia lea galuega.
O lo la faaaogā o laau mo vai e togafiti ai gasegase o le a tufa atu i lea a’oa’oga, o le a faatautaia e nisi o tagata e iai tomai faapitoa i laau.
O le mau a ia taulasea e pei ona faailoa i se pepa o faamatalaga mai le Tiapapata Art Center, ua faigatā ona sa’ili laau e fai ai vai e māfua ona ua mamao lava i uta i fanua o iai taloloa ma le vaomatua nofoaga e maua ai laau fai vai.
Ua māfua lea tulaga ona ua tele ina tatā laau ma faato’a aemaise ua nofoia e tagata ma ua lē toe maua ai i nofoaga tulalata i aai nei laau fai vai.
O se isi lea o vaega o le a silasila iai le a’oa’oga ma sa’ili se auala e totō ma faafailele ai laau e fai ai vai a taulasea.
O Saumalu ma Purinisese o nisi o taulasea o loo lotolotoi i tapenaga mo le toe faatūina o le sosaiete a taulasea Samoa.
O le Aso Tofi ma le Aso Faraile o le vaiaso nei o le a asia ai e i la’ua ma nisi o le a auai i le a’oa’oga i le nofoaga faasao i Togitogiga ma Vailima i le fia molimauina o laau eseese o loo ola ai ma o latou tāua ma aogā i le saunia o vai e togafiti ai ma’i o le tino.
