Ua manuia le sui na faatū e Samoa i le filifiliga o sui o le komiti a Malo Aufaatasi latou te māta’itūina aiā tatau o tagata e iai aafiaga tumau poo le United Nations Committee on the Rights of Persons with Disabilities.
O le Faatonu o le faalapotopotoga o le Nuanua o le Alofa le tama’ita’i susuga Matā’afā Faatino Masunu Utumapu ua avea nei ma sui o lea komiti a Malo Aufaatasi, ma o le taimi muamua lenei ua saofa’i ai Samoa i totonu o lea komiti o loo iai sui o isi malo o le lalolagi.
O le tuuina atu o Matā’afā Faatino e faia iai le filifiliga sa lagolago malosi e le malo o Samoa, ma o le faai’uga o le masina o Mati o le tausaga nei na tuuina atu ai le folasaga a le sui faatū o Samoa mo le filifiliga o sui o le komiti.
O le Aso Lulu o le vaiaso nei na faailoa ai e Matā’afā Faatino Masunu Utumapu i le upega tafa’ilagi a le Nuanua o le Alofa lona filifilia.
Ua faailoa ai ma lana faafetai i le malo o Samoa i le lagolagoina o ia aemaise o isi itutino o le malo ma faalapotopotoga sa galulue faatasi mo le tuuina atu o lona tagata mo le filifiliga.
Ua lagona ai lona faatauvaa i le lagolago ua tuuina atu ma ua ia ta’utino ai, o le a ia faia le mea silisili mo le igoa o le atunuu i lona taimi o le a galue ai i le komiti a Malo Aufaatasi e māta’itūina aiā tatau mo tagata e iai aafiaga tumau.
E tolu tausaga le umi o le a avea ai o ia ma sui o lea komiti.
