O su’esu’ega a leoleo i ni sootaga i Samoa i le faalavelave i le atunuu o Vietnam lea ua tuua’ia ai ni alii talavou e to’alua mai Samoa, ua molia ai nei tagata e to’atolu a o faagasolo ai pea su’esu’ega a leoleo.
O i latou e to’atolu lea e to’alua o loo taofia i le vaaiga a leoleo, ua molia i solitulafono o le ave o faamatalaga sesē i leoleo ma le solitulafono o le faia o ni gaioiga faaālatua ma le pi’opi’o poo le corruption.
O alii o James Atua, o le tama’ita’i o Nakitah Charles ma le taulealea o Fred Papalii sa tula’i i le Faamasinoga Faaitumalo i le Aso Lua mo le valaauga muamua o o latou moliaga, peita’i e le’i tuuina atu ni a latou tali ona e le’i faamautūina moliaga uma a leoleo.
O James Atua ma Nakitah Charles na taofia mai e leoleo i le malaevaalele i Faleolo i le aso 28 o Me, i se faigāmalaga a le Air New Zealand mai Samoa mo Aukilani i Niu Sila.
O i latou e to’atolu ua molia o loo aofa i le to’aiva o tagata ua taofia le toe faaaogāina o a latou teugatupe i se faatonuga mai le vaega su’esu’e o le Faletupe Tutotonu o Samoa.
O le aso 23 o Iuni e toe tutula’i ai i latou ua molia i le faamasinoga.
