Ua tagofia nei e le Faamasinoga o Talosaga toe iloilo a le Faamasinoga Maualuga a Samoa le talosaga a le faipule o Falealili 1, e pei ona finau ai ua aafia ona aiā tatau faalefaavae ona o le faai’uga o le tagi tau palota ua faamaonia ai lona aafia i se faiga faaālatua i le ave o le 150 tālā o se faatosina i se tagata palota.
O le tasi o vaega o lea talosaga a le faipule o loo su’esu’eina e le Faamasinoga o Talosaga poo le Faamasinoga Apili, o le tuua’iga i le faaitu’au o le faamasinoga i le faatinoga o ana galuega a o tagofia le tagi tau palota a Falealili 1.
O le Aso Lulu o lenei vaiaso na faia ai se ‘ava o le feiloa’iga sa faafeiloa’i ai e le Matāgaluega o Faamasinoga ma le Faafoeina o Matāupu Tau Faamasinoga, le afioga i le Pelesetene ma faamasino o le Faamasinoga o Talosaga sa malaga mai fafo e faafoe lea su’esu’ega.
O se faaaloalo sa auai foi ma loia a itu auai o le matāupu o loo su’esu’eina.
E pei ona silafia ua talia e le Faamasinoga Maualuga a le atunuu le talosaga a le afioga Toelupe Maoiautele Poumulinuku Onesemo ma lana loia e ala i se poloa’iga, e taofia ai i se tulaga lē tumau le malosi faaletulafono o le faai’uga a le Faamasinoga o Faigāpalota ua faamaonia ai le moliaga o faiga faaālatua faasaga i le faipule, se’i iloilo muamua le talosaga ua i luma nei o le Faamasinoga o Talosaga apili.
O Faamasino o lea faamasinoga o loo feagai ma iloiloga o Justice Rhys Harrison, Justice Raynor Asher, ma Justice Andrew O’Regan.
