Ua faaleo lagona popole o nisi tagata faigaluega a le Malo, i le fuafuaga a le faigāmalo lea ua sau i tua, i le toe faaitiitia o le aofa’i o le aufaigaluega i galuega a le malo i le 14 pasene i totonu o le isi tolu tausaga o lumana’i, ona o se fuafuaga ina ia faasaoina mai ai le tusa ma le $2.4 piliona tālā.
Na ta’ua i le folasaga a le tama’ita’i Minisita o Tupe, Nicola Willis, e oo atu i le ogatotonu o le tausaga e 2029, e tusa ma le 8,700 avanoa faigaluega a le malo o le a faamuta.
O se alii na tauvā i le fu’a a le Green Party i se tasi o faigāpalota, Asher Wilson-Goldman, na ia ta’ua o le tausaga e 2024 na vāea ai o ia mai lana galuega sa iai i le malo, ma e tolu lelei masina o taumafai e toe su’e se isi ana galuega.
Ma e na te matuā lagona le alofa i nai tagata ia atonu ua na o le faatalitali nei ma vaai poo ai o latou lea o le a aafia ai i lenei vāea, ae poo ai foi o nai a latou uo ma tauaiga o le a aafia; o le isi mea pe sao mai le isi taimi, ae lē uma ai lava le popole pe ono vāea i le isi faasologa.
O lenei suiga tele o le a fai e pei ona saunoa le tama’ita’i minisita, o le a faaitiitia le aofa’i o matāgaluega a le malo, ae faatele le faaaogāina o le AI ma isi auala e faaaogā ai fesoota’iga tau initaneti, ae o le a telē se faasaoina o tupe a le malo o le a maua mai ai.
Saunoa le tama’ita’i minisita, o le faaitiitiga lea o le a aafia ai na o matāgaluega a le malo poo core public service.
E 13 matāgaluega a le malo o le a lē aafia ai, e pei o le New Zealand Defence Force, o Leoleo, Oranga Tamariki, Corrections, Matāgaluega o Faamasinoga, Matāgaluega o A’oga (e lē aofia ai tertiary functions), Government Communications Security Bureau, NZ Security Intelligence Service, le Education Review Office, Crown Law Office, le Ministry of Defence, ma le Serious Fraud Office.
E lē aofia ai foi ofisa faapalemene e pei o le Parliamentary Service ma le Komesina o Sulufa’iga.
Puna o Faamatalaga: https://www.rnz.co.nz/news/political/595712/public-servant-terrified-job-on-the-line-again-after-government-announces-more-cuts
