Faaleo atugaluga o se tinā mai Whangarei, i le faafitauli o loo tula’i mai i se tasi o a’oga o loo a’oga ai si ana tamā, lea na osofa’i ma fasi e nisi tamaiti o lea lava a’oga.
O le aso 11 o Me na tula’i mai ai se faafitauli ina ua osofa’i ma fasi e nisi tamaiti o le a’oga a le Whangarei Boys’ High le tama a lea tinā o loo i le Vasega 11 a lea a’oga.
E faapea se faamatalaga, sa tūtū le tama a lea tinā ina ua tuua le a’oga, i le vaega e faatali ai pasi i le va o le Whangarei Boys’ High ma le a’oga a le Whangarei Girls’ High.
O le faamatalaga a le tamaitiiti, na oo atu se isi tama a’oga ua una’i ma faamata’u le isi tama a’oga o si ana uo, o lea na taumafai ai e fesoasoani e vaovao ma puipui lana uō, ae o inā na tulei ai o ia i tua a o taumafai pea e taofiofi ese lea tama a’oga.
O le taimi lava lea na tamomo’e atu ai isi tamaiti a’oga ma amata loa a latou osofa’iga ia te ia.
O ni ata na pu’e e se tasi i se telefoni feavea’i o lenei osofa’iga o loo vaaia ai le takiki ma tatu’i solo e nei tamaiti le tama a sia tinā, ma e to’alua ni tagata matutua na vaaia le faavave atu ma taumafai e vaovao i le fusuaga.
Fai mai le tinā, na ōi si ana tama i le tigā o lona ua, totoulia le mata ma ni ma’osiosia i lona tino, ae faafetaia ona e le’i oo i se tulaga sili ona mata’utia.
Ua faaleo atugaluga o lenei tinā ona e lē mana’o e tuufau ai pea nei uiga faamimisa o tamaiti se’ia oo ina faateteleina.
Fai mai sia tinā, ina ua sau si ana tama i le fale ma faamatala le mea na tupu, na ia faafesoota’ia loa le a’oga ma alu e feiloa’i ma le staff, ma ave iai le video o le faalavelave na tupu.
O le itu lea e lē o fiafia ai le tinā, ona e lē o manino mai ni fesoota’iga ma le a’oga ae poo le ā foi se latou tali mai i ni gaioiga o latou taumafai e fofō ai lenei faafitauli i nei uiga faamimisa o fanau a’oga.
Na ave e le tinā lana matāupu i luga o le facebook ma amata ai ona faasoa ane manatu o nisi foi mātua ma faasino ai lava i le faafitauli nei o uiga faamimisa o tamaiti i le Whangarei Boys High ma le Whangarei Girls High.
Na maua se manatu o le alii Pule a’oga o le Whangarei Boys High, susuga Alec Solomon ma ia ta’ua ai e matuā lē o māmā i le a’oga le faalavelave na tupu i tamaiti a’oga.
Na ia ta’ua ua suspend po ua faate’a mo se vaitaimi se tasi o tama a’oga ma le isi to’alua o loo taofi i o la aiga mo le taimi nei a o faagasolo su’esu’ega a le a’oga i le mea na tupu.
Saunoa Solomon, e matuā lē taliaina e le a’oga nei ituaiga o amioga sauā, ma o gaioiga na faia e nei tamaiti e lē o se ata lea o uigatausili ma aga e faatalitalia e le a’oga mai a latou tamaiti a’oga.
Ua ia talosagaina ai foi mātua, aiga ma le loaloa o le komiuniti ina ia latou galulue faatasi ma le a’oga e fesoasoani ma lagolago atu i fanau talavou ina ia foia lenei faafitauli.
Mo le Whangarei Girls High, na ta’ua e le tamaitai Pule, Sonya Lockyer, e le’i iai se aafiaga o ana teine a’oga i lenei faalavelave, ma na lagona lona lē fiafia i nisi o lafoga i luga o le facebook e peiseai ua tāaofa’i atu ai ma lana a’oga i uiga faamimisa nei o tamaiti a’oga.
Na ave se tusi a le tama’ita’i Pule i le mamalu o mātua i le Aso Gafua na te’a nei, ma faailoa ai o loo faagasolo foi su’esu’ega a le a’oga i tamaiti uma sa ono aafia ma faamautinoa e faia gaioiga uma ina ia mautinoa o loo saogalemu uma fanau a’oga.
Ua faamautinoa mai e le alii leoleo Satini Sinia o loo faaulu iai puipuiga mo le faaitu i Whangarei, Dave Wilkinson, na tali atu leoleo i lipoti na oo ane i fusu’aga a nei tupulaga talavou, ma e oo atu leoleo ua ta’ape.
Na ia ta’ua foi le tulaga o manatu ua felafoa’i solo i luga o fesoota’iga televavave e uiga i le faalavelave na tupu, ma o lana fautuaga ia i latou nei, e tatau ona taofi nei loa le toe fefaasoaa’i solo o ata o lenei faalavelave i luga o upega tafa’ilagi.
Nai lo lea, na ia fautuaina soo se tasi o iai ni faamatalaga o lenei matāupu, ina ia faafesoota’i atu leoleo i le numera 105 ma faailoa atu le numera, reference number 260512/2514.
Puna o Faamatalaga: https://www.newstalkzb.co.nz/news/national/whangārei-boys-high-school-student-injured-in-alleged-assault-mother-raises-bullying-concerns/
