O pulega faakolone a Niu Sila i Samoa i le tausaga e 1920 se’ia oo ina maua le malo tuto’atasi o Samoa i le tausaga e 1962, o le maota sa avea ma nofoaga tutotonu o le Mau a Samoa i le afio’aga o Vaimoso, o se tasi o pine faamau o taimi o sa’iliga malo a le atunuu, auā sa tapuvae tasi i lea maota tonu fai uma o le Mau.
O le Aso Lua o lenei vaiaso ua umusa ai le galuega ua toe fausia ai lea maota i le finagalo o le malo e faaolaola pea mo tupulaga lalovaoa ma le talafaasolopito o sa’iliga malo a Samoa lea nofoaga.
I talafaamaumau o ia vaitau o pulega a isi malo o le aso 14 o Ianuari o le tausaga e 1930 ina ua tuana’i le tagatavaleina o le afioga i le Tamaaiga le afioga Tupua Tamasese Lealofi III ma isi sui o le Mau e to’avalu lea na faatino e nisi o fitafita a le malo o Niu Sila, na osofa’i ai le nofoaga tutotonu o le mau e fitafita o le vaatau a Niu Sila o le HMS Dunedin, ma o se gaioiga na autū i le faata’apeina o le Mau.
O se tasi lea o polokalame o le aso lona lua o le faamanatuina o le 64 tausaga o le tuto’atasi o Samoa o le umusa o le maota fou o le Mau, faapea ma se tasi o sauniga tāua o le a faatino foi i le aso lona lua o le tuto’atasi, o le tauaaoina o pale ma teufugālaau i tuugamau o nisi o Tamaaiga ua tuumalo, faapea tamalii ma ni failauga o i latou sa tofusao i le sa’iliga o se malo tuto’atasi o Samoa.
O i latou ia e aofia ai le afioga Tuimalealiifano Sualauvi I, afioga Tupua Tamasese Meaole, afioga Tupua Tamasese Lealofi III, afioga Mataafa Iosefo, susuga Malietoa Tanumafili II, afioga I’iga Pisa, ma le tofa Lauaki Namulauulu Mamoe.
