A o faagasolo ai pea su’esu’ega a leoleo i Samoa o loo galulue faatasi ai ma le nofoaga autū o galuega faaleoleo a le Pasefika i Apia e māta’itūina faiga solitulafono faavaomalo i le sa’ilia o ni sootaga o nisi i Samoa i le faalavelave i le atunuu o Vietnam ua tuua’ia ai ni alii talavou mai Samoa, e to’aono tagata ua taofia ona toe faaaogā a latou teugatupe i faletupe faapisinisi a le atunuu.
O lea taofiga ua faia e ala i se faatonuga mai le Kovana o le Faletupe Tutotonu o Samoa, e māfua i se mana’oga mai leoleo ma i latou o loo feagai ma su’esu’ega.
O ia tagata e to’aono e pei ona faailoa i le faatonuga mai le Faletupe Tutotonu o loo aofia ai tagata e to’alua e umia tusifolau Niu Sila, to’atasi le tagata e umia le tusifolau Amerika, ma le to’alua e umia tusifolau Samoa.
O le isi to’atasi e leai se tusifolau.
O le to’alima o ia tagata o ni tagatānuu o Samoa ae o le isi o se tagatānuu o le Iunaite Setete o Amerika ae nofo i Samoa ma e maupaolo i se tama’ita’i o le tatou atunuu.
O le mana’oga o leoleo ma ē o faia le su’esu’ega, e taofi ona toe faaaogā teugatupe a ia tagata ona o loo su’esu’e sootaga o tagata i le pisinisi o taavale totogi pe a fia faaaogā lea e ta’ua o le Unalei Car Rental o loo i Vailoa Faleata.
O lea pisinisi e le’i leva ona tatala ma o se pisinisi o taavale taugatā ma anagatā ma ua faaalia e ni molimau e taugatā foi le totogi e faaaogā ai se taavale e tusa ma le tasi le afe tālā i le aso.
O se alii sa vaaia ma faagaioi lea pisinisi na taofia e leoleo lona tuua o Samoa i le Aso Lulu o le vaiaso nei.
O molimau ma lipoti ua faaalia ai o lea tagata na aveesea mai se faigāmalaga a le Air New Zealand i le po o le Aso Lulu, ma ua faaalia e se molimau na faatino le gaioiga a leoleo ae ua sauni le vaalele e tuua le malae vaalele faavaomalo i Faleolo.
O se tasi o vaega o su’esu’ega a leoleo o loo faagasolo na faasalalau ai le ata o se alii Asia sa galue i lea pisinisi ona o loo mana’omia mo su’esu’ega.
Peitai o le ata na faasalalau e leoleo na tali iai lea tagata ma ia faailoa i luga o upega tafailagi sa aga’i i le ofisa o leoleo ma fesiligia ai o ia, peita’i ua na lē iloa le māfua’aga ua faasalalau ai e leoleo lona ata ae sa ia faailoa iai o le a lagolago i su’esu’ega i soo se itu e mana’omia ai lana fesoasoani e leoleo.
Ua teena foi e lea tagata e lē o ia o se tagatānuu o Vietnam, ae o ia o se tagatānuu o Amerika.
