I le fuafuaga a le faigāmalo talu ai e toe vavae ese le auaunaga o le vaaia o falepuipui mai le matāgaluega o leoleo lea sa faamautū ai se faai’uga i le amataga o le tausaga ua mavae, ma fausia ai le tulafono e faatino ai lea faai’uga, o le Aso Lua o le vaiaso nei ina ua toe tauaofia le fono aoao faitulafono, na toe faaui ai i tua lea tulafono taufaaofi ua mae’a ona pasia le faitauga muamua i le taimi o le paea’iga 17 a le Palemene.
O le afioga i le Palemia, o ia foi o le Minisita o le Matāgaluega o Leoleo, Falepuipui ma le Toe Fuata’ina, na ia faatū le lafo ma pasia e le Palemene ua toe faaui ai i tua lea tulafono.
Ua faailoa ai e le ta’ita’i o le malo o le a toe tapena lelei ia maopoopo lea fuafuaga e ala i le tulafono ona toe tuuina atu ai lea i le Palemene.
Mo le silafia o le tausaga e 2015 na aveesea ai le vaega o falepuipui mai le matāgaluega o leoleo ae faatūina se pulega e feagai ma le faafoeina o auaunaga mo falepuipui uma i le atunuu.
Peita’i na toe tuufaatasia i le tausaga e 2020 ina ua fausia foi se isi tulafono e faatino ai.
O faafitauli sa tutupu mai i le pulega o falepuipui e pei o se sola’aga tele a ni pagota ae le’i leva ona faaaogā le falepuipui fou i Tanumalala na māfua ai ona toe tuufaatasi le vaega o falepuipui ma le toe fuata’ina ma le matāgaluega o leoleo se’ia oo mai i le taimi nei.
