E lē tau faailo le maoa’e ma le mata’ina o taumafaiga a le alii o Stephen Crichton i le taaloga o le lakapi liki.
I le faai’uga o le vaiaso talu ai na molimauina ai ma patipatia e le to’atele o le ‘au a le Canterbury Bulldogs le alii kapeteni i le atoa ai o le 150 o ana taaloga mo le NRL.
Ma o lea na molimauina ai e le kalapu faapea lea alo o Samoa se ata pu’e mai le to’atele o aiga o uo ma ē masani, aemaise le faamanuia a si ona tuaa tinā matua poo lona grandmother.
O le alii o Stephen e lē gata ina mata’ina ana taumafaiga i le taaloga, ae o se tasi ua faailoa le maoa’e o lona ta’ita’iga o tama taaalo ma lana ‘au i soo se taaloga lava, aemaise o tua atu ma le malae.
Ma ona o le tumati’e o taumafaiga a lenei alo o le atunuu, ua to’atele ai tagata ua tepa taula’i i lenei alii ma lona tagata, ma o se tasi ua faaaloalogia e soo se tagata i Ausetalia, Samoa faapea le Pasefika.
Ae ua patipatia ma faaalia le mitamita o le to’atele ina ua sola le alii o Falaniko Solomona Penesa ma le siamupini o le tauvaga ailaoafi i le lalolagi, le 2026 World Fireknife Competition, sa faatautaia i Hawaii.
O le manumalo ai o lea alo o Samoa i lea tauvaga faavaomalo, o se pine faamau lea o le finau o lenei alii, ma ana taumafaiga i le tele o tausaga.
Molimauina i luga o upega tafa’ilagi le momoli ai o le faamalo o le ‘aulagolago i le finau a lenei alo o le atunuu.
E lē o se taimi muamua lea ua suipi ai le alii o Falaniko i lea tauvaga, e pei foi ona ia manumalo ai i le tausaga e 2023, 2019 ma le tausaga e 2017 ae tulaga lua i le tausaga e 2016 & 2014.
O loo molimauina pea le maualuga o taumafaiga a alo ma tamafanau a Samoa i soo se matātā e latou te tauaveina.
E momoli atu ai le faamalo i nei alo o Samoa o loo tumati’e ai le atunuu i le lalolagi atoa.
Puna o Faamatalaga: https://www.fafcebook.com/watch/?ref=saved&v=858957373909043
