Ua logoina nei le mamalu o le atunuu i Samoa e mataala ma nofo tapenapena i le faaono tula’i mai o ni tulaga ma’ale’ale ona o tulaga i suāuu ma penisini maua, auā auaunaga masani o loo faaaogā iai ia oloa mana’omia.
O loo lava suāuu ma penisini o loo iai mo le faaaogāina peita’i ua manatu le soā komiti faufautua a le malo mo tapenaga i taimi o ni faalavelave faafuase’i matuiā, e tula’i mai e taulogologo le atunuu ina ia iai ni tulaga ma’ale’ale e aafia ai auaunaga tau i le maua o suāuu ma penisini ae o loo nofo silafia e Samoa vaega e ao ona nofo sauniuni iai.
O le feiloa’iga na taloina e lea soā komiti faufautua ma le vasega o tusitala na faailoa ai e sui o auaunaga eseese a le malo e aofia ai ma le vaega o galuega ma pisinisi tuma’oti, fuafuaga mo le tali atu i ni tulaga ma’ale’ale e tula’i mai.
O le malosi’aga tau eletise ua silasila e faasoasoa lea auaunaga mana’omia pe afai e tula’i mai se aafiaga i le tulaga i suāuu ma penisini maua, e faapea foi i le lotoifale o le malo i ana galuega faatino, aemaise le soifua mālōlōina ma le matāgaluega o a’oga.
Le ta’ita’ifono o le soā komiti faufautua a le malo mo tapenaga i ni faalavelave faafuase’i matuiā, o ia foi o le Ofisa Sili o le Matāgaluega o Puna’oa Faalenatura ma Si’osi’omaga, le afioga Lealaisalanoa Frances Brown Reupena.
