Ua faaalia nei i ni pepa mai le faamasinoga le tele o faamaumauga i nisi o tala’aga ma le māfua’aga o le maliu ai o le tamā matua ia Tuipulotu Vi, o sē na maliu faafuase’i ina ua fana e se tasi a o taumafai e aga’i i totonu o lana taavale faigaluega.
Faamauina i ripoti mai le leitio faavaomalo a Niu Sila, i nei faamaumauga o loo faamauina ai e iai talitonuga a leoleo, o si tagatānuu Tonga na fasiotia e se tasi o tagata ua ta’ua o le hitman mai Amerika.
Ma o lenei tagata na faatinoina le soligatulafono, e faapea o se tasi e iai ona sootaga i faiga faasolitulafono tetele poo international organised crime syndicate.
O lē o loo tuua’ia nei e igoa ia Tanginoa Pahulu Tangi, ma o loo tuua’ia i lona faimalaga mai i Niu Sila nei e faaoo le oti i ni tagata i le masina o Aokuso o le tausaga e 2024.
I ripoti a le RNZ, o loo faamauina ai o loo molia faatasi nei le alii o Tanginoa Pahulu Tangi ma isi o tagata i le maliu ai o Tuipulotu Vi, ae o le isi to’alima o loo molia i le auai i taupulepulega ma faiga faasolitulafono a i latou o organised crime groups.
Māua foi i faamatalaga a leoleo, o loo latou masalomiaina foi o le syndicate o loo iai ia tagata, lea o loo aumaia i totonu o Niu Sila fuālaau faasāina o le methamphetamine , cocaine faapea laaumalosi, ma e faapea o loo aumai uma mai Amerika.
Ta’ua na amata mai su’esu’ega a leoleo i se faamomoli na taumafai e aumai i Niu Sila ae faalavelaveina e le vaega o le tiute.
E faapea e oo atu i le 18 kilokalama o le ‘aisa ma le 6 o laaumalosi e lē faatagaina ona aumai i le atunuu, o semiautomatics pistols i le masina o Ianuari o le tausaga e 2024.
Faamatala o se taimi mulimuli ane na maua e leoleo le oo atu i le 125 kilokalama o fuālaau faasāina o vaega o loo iai le talitonuga e fesoota’i i le syndicate.
Ta’ua e leoleo, o le latou talitonuga, ina ua lē sao togafiti a i latou nei e aumai i totonu o le atunuu fuālaau faasāina ma laaumalosi, na ala ai loa ona amata faatino gaioiga faasolitulafono ia na tula’i mai i vaega o Auikalani i Saute, e aofia ai Favona, Māngere East, ma Beach Haven.
Faaopoopo mai leoleo, o le atalii o le tamã ia Tuipulotu Vi, lea sa mua’i aga’i iai taupulepulega a le crime group, ae le’i liliu ane i le tamā ia Tuipulotu.
Faailoa e leoleo, o le alii o Tangi na faamatala o se “fly-in, fly-out” shooter, e lē umi se taimi e sau ai, e na o le sau lava, faatino le galuega toe malaga ese, ae o isi e na o ni tagata e na te fesoota’i iai ma fesoasoani atu ia te ia i mea e moomia e pei o laaumalosi i le faia ai o le galuega.
Ae na faamanino lelei e leoleo, e leai se sootaga poo se fesoota’iga ma le auai atu o sia tamā matua ia Tuipulotu Vi i ni faiga faasolitulafono o le auina mai o ni fuālaau faasāina i le atunuu.
O loo tapu mo se taimi lē tumau igoa o i latou o loo aafia i le tulafono se’i vaganā ai le alii o Tanginoa Pahulu Tangi.
O loo tetee uma foi i latou o loo aafia i moliaga.
O loo tālia le tula’i ai o Tanginoa Pahulu Tangi i luma o le faamasinoga.
Puna o Faamatalaga: https://www.rnz.co.nz/news/crime-and-justice/595832/documents-reveal-how-tuipulotu-vi-was-allegedly-murdered-by-us-hitman-tanginoa-pahulu-tangi
