E ui ina feagai atunuu o le lalolagi ma lu’itau tetele i tulaga tau i le tamaoaiga i le taimi nei, aemaise i le siita’i ai o le tau o oloa tau suāuu, peita’i ua valoia e le malo i lana tala faatatau autū o le tupe mo le isi 12 masina o lumana’i e amatalia i le masina o Iulai 2026, o loo fuafua e siitia le tamaoaiga mai le 2 tesimale 8 pasene i le 3 tesimale 0 pasene.
Ua faailoa e le afioga i le tama’ita’i Sui Palemia o ia foi o le Minisita o Tupe, le afioga Mulipola Anarosa Ale Molioo, i le tuuina atu o le tala faatatau o le tupe i le Palemene, o loo fua lea tulaga siitia o le tamaoaiga i le ta’iala fou ua faataoto mo le lumana’i manuia o Samoa, e ala i le galulue faatasi faapaaga ina ia faasafua fesoasoani mo le soifuaga lautele, le faalauteleina o le tamaoaiga faapea le faatinoina o atina’e tetele.
I le aotelega o le tala faatatau autū o le tupe mo le tausaga faaletupe fou 2026 i le 2027 e tasi tesimale lima piliona tālā 580 afe tupe faaalu ua fuafuaina ai, ma e pito mamafa le faasoaina o lea aofa’iga o tupe faaalu i le vaega o le soifua mālōlōina ma a’oa’oga.
O loo manino foi i le faasoa a le malo mo le isi 12 masina le faatino pea o lana pitolaau i le una’ia o le tamaoaiga e ala i tupe faaalu mo isi tautua a le malo, aemaise foi o tautua ua faasafua ai nisi o tupe mo le lautele o le atunuu, e lē gata i le poloketi o atina’e mo le manuia o tagata o itumalo ae o faamanuiaga mo i latou ua penisione.
O le masina o Iulai e amata maua ai le siitaga e 500 tālā o le penisione mo tagata ua aulia le 70 tausaga ma sili atu le matutua o le soifua.
E faapena foi se tasi o fesoasoani tupe e 200 tālā i le masina o le a maua e pepe faato’ā fananau, ma le 100 tālā e maua i le masina pe a atoa le tausaga se’ia oo ina 2 tausaga ma le 11 masina le matutua.
E lē o iai se siitaga i le lafoga o oloa ma galuega faatino le Vagst, ae ua siitia i le 17 pasene tupe maua a le malo mai lafoga totogi.
O le poloketi miliona mo le atina’e manuia o tagata o itumalo e 102 miliona tālā ua faatatauina mo le siitia o tupe o lea polokalame o le atina’e, lea o le a siitia ai i le 2 miliona i le tausaga poo le 10 miliona o le a maua e le Fono Faavae a itumalo palota e 51 i totonu o le lima tausaga o le paea’iga 18 a le Palemene o iai nei.
I le tulaga i le aumaia o fuālaau ma vailaau mo le togafitia o gasegase, e fitu ma le ‘afa miliona tālā tupe ua siitia mo le faatauina mai o ia oloa tāua tau i le soifua mālōlōina.
Sa 14 miliona sa pasia i le tala o le tupe o loo faagasolo lona faasoaina, ae mo le tausaga faaletupe fou o le a siitia i le 21 miliona 500 afe tālā tupe o le a faaalu mo le aumaia o fuālaau ma vailaau faafoma’i.
O lea foi vaegatupe e pei ona faailoa e le Minisita o Tupe i lana folasaga i le Palemene, o le a totogi ai ma aitalafu tuua a le Matāgaluega o le Soifua Mālōlōina.
O fuafuaga a le malo ua taoto i le tala fatatau autū o le tupe fou ua faailoa e le Palemia le susuga Laaulialemalietoa Leuatea Polataivao Fosi i le Palemene, o le a faatino ai ni mafutaga tetele ma le atunuu e faia i Upolu ma Savaii i le mae’a o le tuto’atasi.
O ia faatasiga o le a faamanino atili ai mo le silafia e tagata uma, fuafuaga a le malo o le a faasoa iai tupe a le atunuu i le isi 12 masina o le tausaga faaletupe fou.
O le autū o le tala faatatau fou o le tupe, “Aiga – Autasi i le Gafataulimaina o Atina’e”.
