O se matāti’a le maua ai o faamatalaga i le amata ona amana’ia ma taga’i tagata mai atunuu i fafo i le polokalame toefuata’ina na tuufaatasia e tagata Maori mo ē na aafia olaga i le ‘aisa o le methamphetamine.
O lenei polokalame toefuata’i ua ta’ua o le He Haerenga ki te Whakaora, e faatautaia e le Mātai Medical Reserach ma o lenei polokalame o loo tuufaatasia ai sa’ili’iliga faasaienisi faapea le poto ma le malamalamaga o tagata Maori (mātauranga Māori), o taumafaiga e fesoasoani atu i tagata na aafia o latou ola i fuālaau faasāina.
O taumafaiga ina ia sui ma toe fuata’i olaga o i latou nei ua aafia i le ‘aisa o le methamphetamine.
Faamanino o lea polokalame e faaaogāina ai le masini faaneionapo o le MRI imaging, psychometric testing ma cognitive assessments – o tulaga o sa’ili’iliga i le fai’ai tulou.
Faaalia o le tasi lea o vaega e taga’i ai i aafiaga o le fai’ai, ma le taunuuga i le taimi mulimuli ane i tulaga o loo iai tagata ma a latou taumafaiga i le iai i le polokalame.
Ma ua ta’ua o le tasi lea o itu ua matua’i faaosofia ai le naunauta’iga o sui auai.
Faaalia e se tasi o tagata su’esu’e sinia – Senior Research Associate Wendy Mohi, o le tulaga manuia o lenei polokalame e āfua mai i le faaopoopo ai o tu ma aga faa-Maori faapea malamalamaga faa-Maori i le galuega faasaienisi.
O le tuufaatasia ai o ia vaega e lua, faaalia e lē gata ina fesoasoani ai i tagata i lo latou soifua mālōlōina, ae o lo latou faalogona o mafaufauga lelei ma le mafutaga ma aiga.
I ripoti mai le national wastewater mai leoleo, na māua ai le oo atu i le 34.7 kilokalama o le ‘aisa o le methamphetamine o loo maitauina o loo tagofia ma faaaogāina i totonu o le vaiaso i itu eseese o Niu Sila, aemaise lava i nai masina mulimuli o le tausaga 2025, ma o tagata Maori lava o loo matua’i aafia ai.
Faamanino foi e le ‘ausu’esu’e o le polokalame to’atele o i latou o loo auai o ni tagata ua faamaonia lo latou aafia i le ADHD, ma i le faasolo ai o sa’ili’iliga o loo manino ai, o le to’atele o tagata ua leva ona o latou faaaogāina le meth, o nisi na taumafai e tali atu i ni aafiaga o le faama’i o le ADHD e aunoa ma lo latou iloa o loo latou maua i lea ma’i.
Ta’ua e ta’ita’i o le polokalame, e māfua ona lē manuia taumafaiga ona e lē o mafai ona galulue faatasi ma Maori poo le iai foi o ni polokalame fesoasoani alualu mamao i le mae’a ai o galuega toefuata’i poo le rehabilitation.
Faamauina i sa’ili’iliga ma su’esu’ega, o le to’atele o tagata auai i lenei polokalame ua vaaia le suiga ma ua faatumauina ai foi le iai o i latou i tulaga lelei, ma ua molimauina foi le manuia o fesoota’iga ma aiga faapea mafutaga ma le to’atele.
Faaopoopo mai foi sui na tuufaatasia lenei polokalame o le He Haerenga ki te Whakaora, o le manuia o lenei polokalame o se pine faamau lea o le tāua o le faigāpaaga i lalo o le feagaiga o le Tiriti o Waitangi, ma mea e mafai ona ausia i lalo o lea feagaiga, aemaise o le molimauina ai o le amata amana’ia i tulaga faavaomalo o lenei metotia ma taunuuga ua maua mai ai.
Puna o Faamatalaga: https://www.rnz.co.nz/news/national/595290/maori-led-meth-recovery-model-in-gisborne-drawing-global-attention
