Ua mae’a le taamilosaga o le liki kilikiti faasamoa o le Tuto’atasi i ‘au a alii ma tama’ita’i faapea le taamilosaga faavaomalo sa tausinio ai ‘aukilikiti a alii mai Melepone Ausetalia ma Hawaii.
O le Aso Tofi i le mae’a o polokalame o le Sisigafu’a na faamae’a ai ma tufatufa ai loa faailoga.
O le ‘aukilikiti o le Ainiusami mai Lefaga ua sola ma le siamupini i le vaega o alii, ae ua siamupini foi i le taamilosaga kilikiti lava faasamoa i le tulaga faavaomalo.
O le ‘au a le Tanifa o le Vao mai Sili i Savaii ua maua le tulaga lua i le vaega lava o alii, ma le tulaga tolu o le Fetuao mai Ti’avea.
I tama’ita’i ua siamupini le ‘au o le I’a o le Vai mai Tanugamanono, tulaga lua Teine o le Papaloa mai Vailele ae tulaga tolu o Teine o le Lausalato mai Matautu Lefaga.
Sa maua faailogatupe e ‘au uma sa tausinio e aofia ai ma ‘aukilikiti ua mau tulaga.
E lima vaiaso o faagasolo taaloga o le liki kilikiti faasamoa o le Tuto’atasi.
