O le a amata nisi ālavaa fou se tolu mo le kamupani vaalele a le Air New Zealand, o le a malaga sa’o atu ai mai Kalaiesetete aga’i i Tokyo, Singapore ma Perth i Ausetalia.
Faailoa e le Pule Sili o le Air New Zealand, Nikhil Ravishanker, e ui lava i le ono tausaga o fesaga’i le kamupani vaalele ma lu’itau ae o lea o le a tatala i le faai’uga o le masina o Oketopa nei alāvaa fou e tolu faavaomalo, e lele sa’o atu ai lava faigāmalaga a le Air New Zealand i nei atunuu.
Ta’ua e le Pule Sili i se faatalanoaga ma le NZ Herald, o se taimi muamua lenei talu mai le taimi a o le’i pepesi le Koviti, ua amata ai ona toe talanoa i se tulaga ua toe ola le kamupani, ma o lea ua latou faaaogā ai loa lenei tulaga ola ua toe iai.
E faatalitalia e oo atu i le $390 miliona le lusi a le kamupani mo lenei tausaga faaletupe, lea e faai’u i le aso 30 o Iuni.
Ona o le taua i Sasa’e Tutotonu o le a faaaluina ai le tusa ma le $240 miliona ua sili atu ai nai lo le tau sa faatalitalia e tatau ona totogi mo tau o le suāuu.
Saunoa le Pule Sili, e manatu nisi tagata pe faafefea ona toe tatala nei ālavaa fou a o iai i se tulaga faaletonu lenei taimi.
Ae i se faatalanoaina o lenei matāupu ma le kamupani ua iloa ai, e iai le taimi e toe muta ai le mala o le suāuu o loo iai nei, ae o lea ua mafai e le kamupanī ona faatulaga lelei ana fuafuaga mo auala e faafetaia’i ai le tulaga faigatā o le suāuu.
Na fesiligia foi i le māfua’aga ua faaaogā ai Kalaiesetete e amata mai ai nei ālavaa fou, ae na saunoa le Pule Sili, e telē le sao o Kalaiesetete i le toe faaola mai o le tupe maua a le kamupanī, ma ona o se tasi o aai tele a Niu Sila, e matou te manana’o foi e lagolago atu iai.
O le taimi mulimuli na toe iai ni faigāmalaga tuusa’o a le Air New Zealand mai Kalaiesetete i Singapore o le 2020, o Narita i Tokyo o le 2015 ae i Perth o le 2019.
Ua fetaui lenei fuafuaga ina ua toe amata felelei vaalele e 787 ia sa taofia ma lē mafai ona toe felelei ona o ni faafitauli tau le tausia o afi o vaalele, ma le 787 o isi vaalele fou ua faaopoopo a le kamupanī.
Puna o Faamatalaga: https://www.nzherald.co.nz/nz/air-new-zealand-starts-new-christchurch-routes-to-tokyo-singapore-and-perth/JZCV3ZL7VRG2DMFRHDQWK5KBXY/
