I le faalua ona faataotolia i le gasegase o le pe itutasi o le tino poo le stroke ma umi ai se taimi e leo toe asiasi mai i Samoa, o le tuana’i o le 14 tausaga talu le malaga mulimuli i Samoa a le afioga Faanana Jerome Grey o se tamalii lauiloa i le pese ma le tāina o laau tau musika, ua ave lana faafetai i le ta’ita’i o le malo ona o le valaaulia e faafiafia i le polokalame o faaaliga o taleni musika o le tuto’atasi ua mae’a atu nei, ua toe malaga mai ai e faaali lana taleni musika ia Samoa.
Ua faaalia e Faanana o le tausaga fou e atoa ai le 80 tausaga o lona soifua, ma o lona faamoemoe pe a tumau pea lona malosi, o le a toe malaga mai i le atunuu e faia ai sana faafiafiaga tele e sami ai ia tausaga e tele o lona soifua pe a tusa ma le finagalo o le Matai sili.
O le faatalanoaga a lea tamalii lauiloa o Samoa i le musika na ia faailoa ai i tusitala e lē tuua lana taleni e faaauau pea, e faato’ā tuu lava pe a valaau mai le Matai e tapuni lona fofoga ae alu atu loa.
