Toatele aiga i le atunuu ua faamanuiaina e tauala atu i se polokalame e unaia ai atina’e ma pisinisi laiti a i latou o loo iai le aafiaga o le tamaoaiga ma o loo tua i atina’e laiti ia mo tupe maua.
O le Matagaluega o Tina ma Tamaitai, Atina’e o Nuu ma Agafesootai i se faigapaaga ma le Poloketi a le EWACC e tauala atu i le Matagaluega o Puna’oa Faalenatura ma le Siosiomaga e lagolago ai le lata i le 200 aiga e ala i meafaigaluega mo a latou atina’e ma pisinisi laiti.
A’o le’i tuuina i aiga meafaigalega mo a latou atina’e na auai i latou i ni polokalame poo trainings mo le faatautaia o se pisinisi ae faapea le itu tau seleni lea na faatautaia e le Samoa Business Hub. O ia polokalame na fesoasoani lea i le uunaia o le tomai ma le iloa i le faatinoga ma le faatumauina o a latou pisinisi.
I se feiloaiga i le vaiaso nei na tufatufa ai vaega mulimuli o lenei fesoasoani na ave ai le faamalosiau a le Minisita o Tina ma Tamaitai le afioga Leota Laki Lamositele i aiga uma ina ia faaaogā lelei meafaigaluega ma le avanoa ua tuu atu ai e uunaia ai pisinisi auā se lumanai manuia o i latou ma o latou aiga.
