Ua toe maua le isi tagata faamaonia i le misela i Aukilani ma ua lapatai mai ai ma le matagaluega o le soifua maloloina.
O le case lona lua ua faamaonia e leai sona sootaga ma le case na ta’ua mai i le vaiaso talu ai, peitai e fesootai uma i tagata faimalaga mai atunuu mamao e tusa ma faamaoniga a le soifua maloloina.
O le tagata lona lua ua faamaonia na iai i le emergency department a le falemai i North Shore faapea Waitakere i le po o le Aso Faraile ma le Aso Sa faatoa uma atu ma o lea foi sa i le Aoga Amata a le Busy Bees Hobsonville i le vaiaso talu ai mo le tolu aso.
Ona o le tagata lona lua lea ua faamaonia i totonu o le vaiaso, ua toe valaau mai ai ma le soifua maloloina e tautuana tuipuipui o le misela, ma ua sau ai ma le faamanatu e le tatau ona alu e vaai le fomai e aunoa ma le valaau muamua i le telefoni ona o le taumafai e taofiofi le vave pepesi o le misela.
