Ua toe faatoese se tasi o tagata pue ata a le vasega o tusitala i le minisita o aoga Jan Tinetti e tusa ma le feto’ai o lona ao ma le meapueata ananafi.
A o agai atu ai le minisita i le maota fono ananafi na faafuasei ona afaina i le meapueata ma na faatopetope ona aveesea mai le nofoaga na faamanualia ai e le sui taitai o le National Nicola Willis ma o lea foi na fautuaina e Nicola e fai sana malologa mai le fono pe afai o niniva.
O le fomai a le Labour, o ia foi o le minisita o le soifua maloloina Dr Ayesha Verrall lea na vaaia.
Na ta’ua e le sooupu a Tinetti ona o le tiga tele o le ao o le minisita na mānava ai loa i lea taimi, ma o lea e lei auai i le taliga fesili i le maota ananafi.
E le gata ua faaleo le faatoesega ae o lea foi ua mae’a faaoo atu le tusi faatoese a le sui o tusitala ma ua toe faamanatu ai i le vasega o tusitala ia tautuana le saogalemu o sui o le fono a o iai i la latou galuega.
