O se finagalo lea o le minisita o aoga Seuula Ioane Tuuau, ina ua fesiligia sona finagalo i le tulaga pepesi o le faama’i o le fulū o loo iai nei.
Na saunoa Seuula, o le lua vaiaso o loo malolo pe o loo tuua ai aoga, o loo mata’itu lelei e le matagaluega o aoga le gasologa o le faama’i o loo pepesi nei, i le tulaga o le toatele o fanauiti o loo auina atu i falema’i faaitumalo, o falema’i tutoatasi faapea le falema’i tele i Motootua.
Sa saunoa le minisita, “i le vaiaso o tuuaga, o loo faalagolago atu le matagaluega i lipoti mai le soifua maloloina, o le a feiloai ma faia se fonotaga ma le soifua maloloina a o lei faia se faaiuga. Afai o le a maitauina pea le faatupula’ia o le aafia o fanau, ma leai se tulaga lelei o le foia, o le a tuuina atu loa se faasalalauga e faaauau ai pea ona tuua aoga.”
O le vaiaso lona lua nei o tuuaga o aoga a le Malo ae o loo matauina pea i le nofoaga o le falemai i Motootua le faatumulia o fanau e saili togafitiga ona o le faama’i o loo pepesi nei o le fulū.
