Ua malo le finau a le malo i la laua finauga umi ma le iuni a leoleo e faatatau i totogi o malu o le malo, ma ua sau ai ma le tala e ono toatele leoleo e faamavae.
E tusa ma le tausaga o fefālōa’i itu nei e lua peitai e leai se tali, ma o lea na aumai ai le sui tutoatasi, Vicki Campbell o se tasi o tagata faapitoa i tulafono tau galuega e filifili poo lē fea le ofo e tatau ona faaaogā, poo le malo poo le iuni.
Na sau le tali ananafi ua malo le ofo a le malo, poo le ofo lenei e tutusa ma le ofo na aumai ia Aperila.
Na lipotia e le leitio a Niu Sila le faanoanoa o le asosi o leoleo e tusa ma saunoaga a le peresetene Chris Cahill ananafi ona o le faai’uga, peitai e leai se mea e mafai ma o tulafono foi o le faai’uga ua iai nei, e lē mafai ona toe iloilo pe apili e se tasi.
O le ofo ua manumalo nei, o loo sau ai:
- $1,500 e totogi mai i le taimi e tasi
- $5,000 siitaga i totogi ma le siitaga e 5.25% i alauni mai le aso muamua o Novema 2023, ae lē o Iulai 2023 e pei ona mananao iai le toatele o leoleo
- 4% siitaga o totogi faapea foi siitaga o alauni e amata mai le aso muamua o Iulai o le tausaga nei
- 4% siitaga o totogi faapea foi siitaga o alauni mai le aso muamua o Iulai o le tausaga fou
- Ma o le a amata totogi ovataimi i taimi talafeagai, e amata ia Iulai o le tausaga fou
Puna o Faamatalaga: Government wins in pay dispute with police union | RNZ News
