O lea ua aveese uma mai tofiga minisita sa ia Stuart Nash.
O le faaiuga lea a le Palemia Chris Hipkins na faailoa mai anapo ina ua toe maua isi mea sese a Stuart Nash ua ia solia ai le tusi tulafono o loo taialaina ai le Kapeneta poo le Cabinet Manual.
A o lei sau le faaiuga anapo o lea sa toe tuu atu iai e Hipkins le avanoa mulimuli i le mae’a aveesea mai ai o le tofiga minisita o leoleo e mafua i lona faitioina o faaiuga a le faamasinoga.
Na lipotia e le Stuff anapo o le faaiuga ua iai nei ua mafua ina ua toe maua ane o lea sa lafo e Nash se imeli i nisi o taitai faipisinisi i le tausaga e 2020 a o avea lea ma minisita o pisinisi laiti.
O se imeli na alu ai ma talanoaga a le Kapeneta e faatatau i se tasi o fesoasoani mo pisinisi na talanoaina i lea taimi i le laulau a le Kapeneta.
O loo manino i le Cabinet Manual e le tatau ona faalauaitele i tua talanoaga a le Kapeneta faapea fonotaga a komiti o le Kapeneta, ma ua fai mai ai le Palemia ua le malu ia Nash mataupu o le Kapeneta, ma ua leai ai ma sona toe talitonuina.
