Ua faaopoopo pea tagi o faatosina o le palota ua toe faasolomuli mai i tua  ina ua lē faaauauina suesuega a le faamasinoga o palota i le mataupu na faaulu e le sui tauva o le vaega faaupufai e Puipuia Aia Tatau o tagata sa avea foi ma Minisita o le Kapeneta i le paeaiga lona 16 o Samoa  le afioga ia Afamasaga Lepuia’i Rico Tupai e faasaga i le sui tauva o le vaega o le Faatuatua i le Atua Samoa ua Tasi  le afioga ia Toeolesulusulu Cedric Schuster. A’o amatalaia taualumaga o le faamasinoga o le mataupu lenei i le Aso Lulu 30 o Iuni 2021 na maua le feiloaiga i fafo o potu faamasino ma matai o sui o Aana Alofi No.4 ma le sui sa tauaveina le tofi faipule faapea le sui na manumalo.

O le feiloaiga lea na toe tatalo ai i le afioga ia Afamasaga e lafo le tofi i le sui ua filifilia ae tapua’i aua e pisa lava tama ae o uso. Saunoa lē sa avea ma faipule ma ave lana tuualalo e taatia atu sei agai i le faamasinoga e maua ai se tali i le tatalo a le itumalo.

O le maea ai la o le mataupu na faailoa ai e lē na tagi ua ia fausia le finagalo o le itumalo o le a toe faaui i tua ana moliaga.

Taua e Afamasaga “lagona lava i lenei taeao, o le mea aumai le agaga o le Alii o le mea lena e fai, o le tilotilo foi tulaga foi o le tau mai i lenei taeao ma le itumalo, lagona a le momomo o le loto, lagona foi le mafatia alofa i le itumalo ma le taumafai mai i lenei taeao ma le latou talosaga mai ae le gata foi i lena tilotilo foi tulaga o loo iai nei le malo  ma lea ua manatu ai lenei taeao i totonu o le faamasinoga o le a faaui tua le mataupu  ae lafo le faaaloalo le afioga ia Toeolesulusulu Cedric e folau ai foi mo lenei 5 tausaga i le faigamalo ma tulaga i le Palemene faapena foi lana tautua mo si ma itumalo. Ia o le a taalo mai foi tua ma lagoalgo mai aua nisi o atinae mo le nuu ma le itumalo. E faafetaia aiga, faafetaia nuu ona o le tapuaiga.”

Na faatalatalanoa foi le sui manumalo ma na taua e Toeolesulusulu “E faafetaia foi i le uso lea ua uma ona soalaupule ma ua finagalo e faaui i tua le mataupu, e faafetaia foi i le finagalo o le itumalo lea ua mafai ona faataunuuina e sii ai lava le viiga i le Atua”.

O se tasi lenei o mataupu mai le tele o faamasinoga o tagi o le palota ua toe faaui i tua.