O le aso muamua o Iulai le Aso Faraile o lenei vaiaso o le a toe taulimaina ai e le Pulega o fela’ua’iga i luga o le Laueleele le Land Transport Authority, galuega uma tau i le lesitala ma pasia taavale uma i le atunuu, le faia o laisene avetaavale ma le vaaia o mita mo le tutū o taavale i nofoaga i le taulaga ua faatutū ai mita.

O le toe foi o ia galuega i le pulega o fela’ua’iga i le laueleele, o le tumau ai pea ona feagai le matagaluega o leoleo, falepuipui ma le ola toe fuata’ina ma le faamalosia o tulafono tau taavale afi e aofia ai ma le vaaia o mita mo le tutū o taavale i nofoaga o loo iai mita.

O le tausaga e 2008 na faavaeina ai le pulega o fela’ua’iga i le laueleele ma latou tauaveina ai le vaaia o galuega tau auala tetele uma o le Malo, ma le vaaia o taavaleafi i le laiseneina ma pasi, faapea ma le faia o laisene avetaavale o ni galuega sa i le vaaiga a le matagaluega o leoleo i ni tausaga ua tuana’i. Peitai o le tausaga e 2019 na toe ave uma ai ia galuega i le matagaluega o leoleo, ma motusia ai ma galuega a nisi o tagata faigaluega o lea pulega, i latou sa feagai ma le faamalosia o tulafono tau taavaleafi i luga o alatetele poo traffic officers.

O le see atu o le faigamalo fou na faia ai le faai’uga a le Malo e ala i le Minisita o Leoleo ma Falepuipui, e toe ave galuega ia i le pulega o fela’ua’iga i le laueleele, ae faatino e leoleo tiute o le faamalosia o tulafono uma tau i le saogalemu i luga o auala tetele faapea ma tulafono o taavaleafi e ala i le molia o i latou e solia ia tulafono. O le Aso Tofi nei o le aso mulimuli o Iuni ua faamae’a ai le tauaveina e leoleo o galuega tau taavaleafi i le laisene, pasia o taavale ma le faia o laisene avetaavale.