O le vaiaso mulimuli o Aperila o le tausaga fou 2025 ua faatulaga e su’esu’e ai e le faamasinopga maualuga moliaga e fitu a leoleo ua tuua’ia ai le susuga Mase Mahonri Schwalger, ua faamālōlō lē tumau mai lona tofiga o le faiaogaulu o le ‘aulakapi a le atunuu le Manu Samoa, e tālia ai se taunuuga o su’esu’ega a le faamasinoga i ona moliaga.
O le alii loia o Shane Wolf sa tula’i mo Mase e avea ai ma sui o le tamaitai loia o Leinafo Tuimalealiifano Strickland o loo tauaveina moliaga o le faia’oga o le Manu Samoa.
E le’i mafai ona faailoa i tusitala e le loia a le itu a leoleo moliaga e fitu, i le faamatalaga e tatau ona iai se auala e uia poo se system e faamatuu ai faamatalaga o moliaga solitulafono mo le faasalalauina.
O le taimi muamua lea ua ilitata ai se loia a le malo e tula’i mo leoleo e faailoa poo ā moliaga o se tagata o loo tuua’ia aemaise ua mae’a tuuina atu le tali a lē o loo tuua’ia i moliaga.
Peitai e pei ona silafia ua mae’a ona faailoa e le Komesina o leoleo i auala o faasalalauga moliaga o Mase Mahonri Schwalger, ma o ni moliaga tau faiaiga faamalosi na faaulu ai se tagi i leoleo e se tamaitai.
Ua faaauau ona tatala Mase Mahonri Schwalger i aiaiga ua mae’a faatulaga e faatali ai le aso 28 o Aperila o le tausaga fou e valaau ai molimau a leoleo ma molimau a lē o loo molia.
