O le taeao nei na faailoa mai ai e se tasi o sui faavae o le Faatuatua i le Atua Samoa ua Tasi Laaulialemalietoa Leuatea Polataivao Schmidt lea na iai le fuafuaga e savalia ai ofisa o le malo ina ia faatula’i ese le vaega a le HRPP o loo iai ae fa’aulufale atu le faigamalo fou.
Peitai i le te’a laititi ai o le itula e 10 i le taeao nei na taulimaina ai e le vaega faaupufai a le FAST se tusi mai ia Tuilaepa ma le HRPP e faapea “e lē talia le fuafuaga a le FAST e oo atu i ofisa o le malo”
O se tali na faailoa ai le le fiafia o Laauli ma faapea “Samoa o lea ua faamaonia i le asō e le fia oese, Tuilaepa ma le HRPP, ua le fia oese e ui ua uma ona aumai le finagalo a Samoa o lana pule lea e tu manumalo ai le FAST mo le tauaveina o le malo fou ae ua lē fia oese”
Taua foi e Laauli “ua oo i le faaiuga na tuumai e le faamasinoga ma faamaonia le mauluga pea o le aofai o sui a le FAST ae ua lē fia oese lava le HRPP”
O lea ua tuu atu foi se isi talosaga a le FAST i luma o le faamasinoga e faamalamala lelei mai ai le tulaga o le 10 pasene lea na fai ai le iuga a le faamasinoga.
O fesili a le FAST e aofia ai “poo fea e taoto iai le 10 lea na finauina, poo se mea talafegai le taofi o le toe tauaofia o le palemene sei maea faamasinoga o le palota, pe mafai ona tuu mai se faauigaga malamalama aua ua nunumi faasoloatoa e sili ai la le toe tuu i le faamasinoga mo le tali”
O le fautuaga a le FAST ia tausi pea le filemu ma e le faavaivai i le tau o le taua mo le atunuu e saili le moni ma le sa’o.
Taua foi e Laauli pau le faatuatuaga mo Samoa i le taimi lenei o le faamasinoga ma o le a tālia se tali mai a le faamasinoga i le latou talosaga fou.
