Ua iai nei i le afioaga o Satuiatua se tasi o maota poo se hall tele i se taumafaiga a le nuu e faaaogā i ni sauniga tetele ma soo se faamoemoe ae lisi atu ina ia maua ai se isi alagatupe e fesoasoani i atina’e a Satuiatua mo le manuia o ona tagata.
O se galuega na a’e i se finagalo o alii ma faipule e pei ona limalima faatasi iai le komiti a tina ma tamaitai, ma le ekalesia Metotisi i le afioaga i o latou sao tau tupe e ta’i 20 afe tālā, ae lagolago iai le poloketi o le miliona tālā a le itumalo o Palauli 1 i le faatupeina.
Na fesoasoani foi ma togimaa isi aiga ma tagata o le nuu i le galuega ma mafai ai ona fausia lea maota tele o se multi-purpose hall i le tau e SAT321, 991.71sene.
Na faaalia e se tasi o matai tamaitai o Satuiatua le afioga Leilua Tutogi Mailei na mafua le finagalo o matai ma le nuu e fausia lea maota tele ona i lea faaitu o Savaii e leai ni maota tetele mo mea fai ma sauniga e to’atele tagata e auai, faapei o faaipoipoga ma aso fanau.
O le tatalaina o lea galuega na valaau faaaloalo ai le afioaga i lo latou sui faipule le Minisita o Tina ma Tamaitai Atina’e o Afioaga ma Agafesoota’i, le afioga Mulipola Anarosa Ale Molioo, na te ootiina le lipine e tatala aloa’ia ai le maota.
O le fanua o loo fausia ai i luga le galuega o se foa’i a le Ekalesia Metotisi.
