Ua fai paaga nei le Malo o Samoa ma le Faletupe o le Pasefika i Saute, le Bank of the South Pacific i le faafoeina o le fono a sui o atunuu o Malo o le Taupulega o loo lotolotoi i auaunaga ma galuega tau tupe i atunuu e 56 o loo avea ma sui o Malo o le Taupulega.
O lea fonotaga ua taulimaina ai e le Malo o Samoa ma lea faletupe se foai e tasi le miliona 250 afe tala, mo le faatupeina o lea fonotaga o le a usuia i le masina o Oketopa i le taimi tonu o le Fono a Malo o le Taupulega.
O le vaiaso na te’a nei na faamautu ai lea faigapaaga i se sainigalima i le va o le ta’ita’i o le Malo le afioga i le Palemia, Fiame Dr Naomi Mataafa, ma le Ofisa Sili o le faletupe o le Pasefika i Saute.
O sui o Samoa o le a auai i lea fonotaga ua ta’ua o le Commonwealth Business Forum, o i latou mai auaunaga a faletupe faapisinisi i le atunuu ma sui o le aufaipisinisi le Samoa Chamber of Commerce.
