Sa faailoa e le tamaitai na avea ma Peresetene o le Sosaiete o Loia a Niu Sila, Tiana Epati i luga o upega tafailagi le Instagram lea mataupu ina ua taofia e le sikulatī lona ulufale ai i le fale faamasino ona sa iai lona manatu o Tiana o se tagata o loo molia i se solitulafono.
Na pu’e e Tiana Epati lona ata ma tuu i luga o le upega tafailagi na tusia ai tala ia i le gagana peretania
“So it finally happened. Got mistaken for a criminal defendant this morning when going to enter court, held up by security and asked for my name on the [court appearance] list. Thought I would include a selfie to show I was actually wearing one of my nicest suits too.”
E pei ona silafia o le tamaitai Loia ia Tiana Epati sa tofia e avea ma Peresetene o le Sosaiete o Loia i Niu Sila i le tausaga e 2019 ma avea ai ma se tagata Pasefika muamua ua faamanuiaina i lea tofiga. Ua 4 nei tausaga talu ona tulai mai i le tofi ae matuā faate’ia o ia i le tulai mai o lea mataupu i le fale faamasino.
Ta’ua e Tiana i sana faatalatalanoaga ma le TheCoconetTV, na ia tali i le sikulatī ma fai iai, ‘O e iloa o a’u o le loia?’ “You know I am a lawyer, aye?” Na toe vave tali ifo le sikulatī ma faatoese ia te ia.
Ina ua faailoa e Tiana le mataupu lea i luga o upega tafailagi e toatele tagata ua fesoota’i ane ia te ia ma faailoa ai sa tupu foi ia i latou ituaiga faiga faailogalanu faapea ma e lē tatau ona toe tulai mai. O Tiana o lona tuaa tamā o le Samoa mai afioaga o Falealupo ma Saleimoa, le Afioga Aeau Semi Epati o le uluai loia Pasefika na tofia e avea ma faamasino i Niu Sila i le tausaga e 2002.
