O lea ua iai se suiga i le aiaiga o malaga e ulufale ai tagatanuu o Samoa i le teritori faapea ona ulufale i Samoa Tutoatasi tagatanuu o Tutuila ma Manu’a e aunoa ma se pemita, lea sa 7 aso ae ua siitia nei i le 10 aso.

Ua faailoa i se lipoti a le vaega faasalalau o le Talanei o le suiga lenei na amata faamamalu i le Aso Gafua o le vaiaso na te’a nei le aso 12 o Aokuso.

Ua faailoa e le Loia Sili a le faigamalo a Tutuila ma Manu’a i lea lipoti o le mae’a ona iloiloina o lea aiaiga tau malaga i le va o Samoa e lua e pei ona sa amata faamamalu ia Oketopa o le tausaga na te’a nei, na iloa ai le aogā tele o lea faiga fou i tagatānuu o Amerika Samoa e fia ulufale i Samoa Tutoatasi.

I totonu o le ono masina talu ona faatino lava lea suiga tau i malaga i le va o Samoa e lua, e tusa ma le 195 tagatanuu Amerika Samoa e ulufale i Samoa tutoatasi i le masina, faatusatusa i le 145 o tagatanuu Samoa e ulufale i le teritori i totonu o le masina.

Faaalia foi e le Loia Sili a Amerika Samoa i lea lava lipoti e itiiti lava le numela o tagata na silia aso e nonofo ai i le teritori talu ona amata lea aiaiga fou i malaga e aunoa ma se pemita.

E pei ona silafia o se tasi lea o aiaiga na fausia i le fono o le Atoa o Samoa sa talimalo ai le faigamalo a Tutuila ma Manu’a.