Ua faailoa manino a Korea i Matu sa o latou faatinoina se faata’ita’iga o missiles i le taeao ananafi, o se gaioiga e talitonuina ua ausia ai se taimi umi e fana ai se a’upega faapea a le atunuu.
Ua faia lea faata’ita’iga ae toe o ni nai aso faataunuu le palota a Amerika mo le tofi peresetene ma ua faia foi i le mae’a ona lapata’i mai Korea i Saute ua fuafua Pyongyang e fana a’e foi a latou faata’ita’iga i le vaitaimi tonu o le palota.
Ua lipotia le faatino e Korea i Matu o le latou gaioiga lea a o faamalosia atili ana taumafaiga i le gaosia o meatau faaniukilia ma faamalosia foi a latou sootaga ma Lusia ma ua atili faatupula’ia ai popolega o le to’atele.
Ua faamaonia e sui mai Iapani o le missile lea na fana a Korea i Matu na lele mo le 86 minute ma e ono oo lona maualuga i le 7 afe kilomita ma pa’ū ai i le sami i le itu i Sisifo o Okushiri Island i le itu i Matu o Hokkaido ma e lē taumate o se ituaiga fou lea o lea a’upega ua faia.
E lē o fiafia Amerika i ia faata’ita’iga a Korea i Matu fai mai a latou o le solia lea o aiaiga tau le puipuiga a Malo Aufaatasi ma o le a faatino e Amerika galuega uma e faamatinoa ai le saogalemu o lona atunuu ma le Republic of Korea ma Iapani.
Puna o Faamatalaga: https://edition.cnn.com/2024/10/30/asia/north-korea-icbm-test-intl-hnk/index.html
