O le tamaitai ia Vaimooi’a Astrid Ripley e mai le afioga o Motootua, Sapunaoa, Poutasi, Matautu Tai, Faleapuna ma Falelatai ua sauni atu nei e faalealea le tagavai o Samoa i taaloga o tuuga vaafaila i le taamilosaga o le Olimipeka lea e faia i Farani ia Iulai o le tausaga nei.
E tele ituaiga tuuga vaa o le a faia i lenei taamilosaga ae ua filifilia lenei tuuga vaafaila auā o se taaloga sa fiafia mai ai lava a o laititi.
O Vaimooi’a Ripley na amata fiafia i lenei taaloga mai i lona laititi seia oo lava ina matua, auā o lona aiga sa tele ina fiafia e fai lenei taaloga.
O lea foi ua tuputupu a’e ia i lana tupulaga e fiafia e faaauau le taleni a lona aiga.
O le tele o ana tapenaga o loo iai mo le tauvaga a le Olimipeka i Farani o loo vaaia ai le malosi o le lagolago o lona aiga i Samoa aemaise ai foi o Ausetalia i Sini i le nofoaga o loo faamautu ai.
O le faaiuga o Iuni e vave malaga ai mo Farani auā le faatinoina o nisi o ana koleniga a o lei malaga atu le latou autaalo i le amataga o Iulai auā le faamoemoe o le Olimipeka.
E lagona lona fiafia e fai o ia ma avefu’a o Samoa i taaloga vaafaila i Farani.
