Ua lapatai mai le National i le ono toe faia o se isi faigāpalota a Niu Sila pe afai ae leai se taunuuga manuia o feutanaiga ma Winston Peters ma lana New Zealand First.
O saunoaga nei a le taitai o le National, Christopher Luxon i le faaiuga o le vaiaso a o leotele ai pea le manatu e lē atoa nofoa e ausia e le National ma le ACT ma e la te moomia ai le ioe a Winston Peters auā le fauina o le isi faigamalo.
I le palota faapolokiki a le 1News i le vaiaso talu ai e na o le 59 nofoa e maua e le National ma le ACT ma o lona uiga e moomia le sau i totonu o le New Zealand First e atoa ai le 61.
Na tautino Luxon e lē faigofie le galulue o le National ma le NZ First auā o le mea moni e lei iai lava sa laua faiga faapaaga e osi ai se faigamalo, a toe tepa foi i le osiga feagaiga na iai le Labour ma le NZ First i le 2017, e lei faigofie.
Ae i se tali mai a Winston Peters ananafi, ua taufaafefe e le National le atunuu.
O loo faasolo pea le advance voting a o lei oo i le Aso Toonai nei, le aso o le palota tele a Niu Sila.
