Ua unaia e le lala o le faalapotopotoga o Palemene a Malo o le Taupulega le Commonwealth Parliamentary Association, le tatau ona unaia malosi e ona sui auai e pei o Samoa, le siitia o le tulaga auai o tina ma tamaitai i upufai o Malo e ala i tofi faipule o itumalo i le Palemene ina ia ausia ai le tulaga avanoa tutusa o le itupa o alii ma tamaitai.
O se mataupu ua faaiugafonoina i le mafutaga faaseminā a sui faipule o Malo e 12 o le Taupulega sa auai i le fonotaga ua maea ma sa auai sui faipule e toalua o le Palemene o Samoa le afioga Aliimalemanu Alofa Tuuau ma le tofa Tuuu Anasii Leota.
O le Aso Lua o le vaiaso nei na faatoa usuia ai se fono faapalemene a lea lala o le faalapotopotoga o Palemene a Malo o le Taupulega i lo tatou atunuu sa auai na o se vaega o faipule o le Fono Aoao Faitulafono, ma sa folasia ai ma se lipoti a sui faipule ua toe taliu i fanua ina ua mae’a lea fonotaga.
O le tasi lea o mataupu o le lipoti sa faaali ai iai finagalo o sui mamalu o le Palemene o Samoa, ma atagia mai ai, o loo noatia le tulaga auai o nisi tina ma tamaitai o le atunuu e tauva i tofi o itumalo ona o tapu e pei o le lē mafai ona faaee iai ni suafa matai, auā ua na o i latou e umia suafa matai ua lesitala faaletulafono e agavaa ona tauva i faigapalota mo sui usufono o le Palemene.
Na saunoa le sui faipule le tofa Maulolo Tavita Amosa, o lona itumalo e iai afioaga e le mafai ona matai tamaitai, ae o se isi afioaga e mafai ae le mafai ona auai i fono a alii ma faipule o le nuu.
Se vaega o finagalo faaalia i le fono faaseminā a sui faipule o loo talanoaina ai mataupu eseese mai fonotaga a le lala o le faalapotopotoga o Palemene a Malo o le Taupulega.
E pei ona silafia ua taoto teuteuga o le tulafono faavae o le tatou Malo ua aiaia ai le 10 pasene o nofoa faaopoopo o tina ma tamaitai i le palemene lea ua siitia ai le numela o tamaitai e auai i faigaupufai ma avea ma sui faipule.
O loo tālia nei le lipoti a le Komisi suesue o faigapalota lea ua tauaao e le Palemia ma le Kapeneta, mo le talanoaina e le Palemene.
O lea lipoti o loo iai fautuaga mo le toe faaleleia o faigapalota i le lumanai, ma ua aofia ai ma ni fautuaga i le 10 pasene o nofoa faaopoopo o tamaitai.
O le a faatoa iloa ia fautuaga i le taimi e folasia ai le lipoti a le komisi suesue o faigapalota i luma o le fono aoao faitulafono.
